చేతి గీతలు నా భవిష్యత్తు చెప్తాయన్నారెవరో
హస్త రేఖలు బాగుంటే పట్టినదంతా బంగారమన్నారు మరెవరో
ఏమో అది నిజమో కాదో నాకు తెలీదు
నిజమేనా అని దేవుడినే అడిగా, చెప్పాడు అవి ఏమిటో
వెంటనే పరిగెత్తికెళ్లి అమ్మనడిగా నిజమేనా అని ?
అమ్మ నవ్వి తన చేతిలో రేఖలు చూపించింది.
దేవుడేమి చెప్పాడని జాతకనిపుణులు అడిగారు
నేను బిందువుగా అమ్మ కడుపులో చేరి
దాన్నించి ఎప్పుడు బయటకొద్దామా అని
కడుపు బంధిఖానా అనుకుని తన్నేవాడినట
తన్నిన ప్రతిసారీ దేవుడు నా అరచేతి మీద కొట్టేవాడట
ఆ దెబ్బలే ఇప్పుడు రేఖలుగా మిగిలాయట
బిందువై మొదలై బాంధవ్యాలు పెంచుకుని
అవి తిరిగి తెంచుకుని బూడిదిలా మారే వరకు
ఆ తొమ్మిది నెలలను గుర్తు పెట్టుకోమని ఇచ్చిన చేతి గీతలట
అవునేరీ ఆ జాతక నిపుణులు? బహుశా అమ్మ దగ్గరికెళ్ళారేమో?
